У адкрыцці выставы прынялі ўдзел Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Се Сяоюн; генеральны дырэктар Нацыянальнага мастацкага музея Рэспублікі Беларусь Уладзімір Іванавіч Пракапцоў; дырэктар Рэспубліканскага інстытута кітаязнаўства імя Канфуцыя БДУ Анатоль Апанасавіч Тозік; дэпутат Палаты прадстаўнікоў Нацыянальнага сходу Рэспублікі Беларусь Сяргей Міхайлавіч Клішэвіч. Прагучала відэавіншаванне ад дырэктара Нацыянальнага мастацкага музея Кітая У Вэйшаня.
Выставачны праект прысвечаны развіццю дыпламатычных адносін паміж Рэспублікай Беларусь і Кітайскай Народнай Рэспублікай, устаноўленых 20 студзеня 1992 года. Правядзенне гэтай выстаўкі – агульны ўклад у пашырэнне і ўмацаванне стратэгічнага партнёрства, дружбы і культурнага супрацоўніцтва паміж народамі нашых краін. На выстаўцы прадстаўлены розныя віды і тэхнікі выяўленчага і дэкаратыўна-прыкладнога мастацтва Кітая XVII – пачатку XXI ст. У склад выставы “Беларусь – Кітай. Супрацоўніцтва і сяброўства” ўключаны прадметы, якія рэдка экспануюцца, перададзеныя музею ў дар вядомымі кітайскімі мастакамі або набытыя ў калекцыянераў у розныя гады. У рамках выставачнага праекта прадстаўлена каля 70 унікальных экспанатаў.
