Урачыстае адкрыццё выставы «Традыцыя ў сучасным вымярэнні»

17 кастрычніка 2025 года ў 16.00 адбылося ўрачыстае адкрыццё выстаўкі “Традыцыя ў сучасным вымярэнні” работ навучэнцаў аддзялення традыцыйнай культуры і сучаснага мастацтва ўстановы адукацыі “Магілёўскі дзяржаўны каледж мастацтваў”.

Мастацкае аддзяленне вядзе сваю гісторыю ад 1989 года. Яно стала творчай лабараторыяй, дзе фарміруюцца новыя пакаленні майстроў. Тут працуюць вопытныя педагогі - члены Беларускага саюза мастакоў, члены Беларускага саюза дызайнераў, удзельнікі рэспубліканскіх і міжнародных выставак і пленэраў.

Выстава стала сапраўдным мастом, які злучае мудрасць стагоддзяў з энергіяй маладосці. Гэта - магчымасць убачыць, як жывая нітка традыцыі не абрываецца, а пераплятаецца з новымі ідэямі, ствараючы ўнікальны і яркі ўзор сучаснага беларускага мастацтва.