Выстава “Мора. Неба. Аблокі” прысвечана адлюстраванню ў беларускім мастацтве ХХ стагоддзя прыродных з’яў і разнастайных форм адпачынку чалавека на прыродзе ў розныя поры года.
У экспазіцыі будзе прадстаўлена звыш 50 твораў жывапісу, графікі, скульптуры, дэкаратыўна-прыкладнога мастацтва ў жанрах сюжэтна-тэматычнай карціны, пейзажа і партрэта больш як 30 беларускіх мастакоў мінулай эпохі са збору Нацыянальнага мастацкага музея Рэспублікі Беларусь. Часавы дыяпазон работ, якія дэманструюцца на выставе, ахоплівае перыяд з 1920-х па 1980-я гады – ад графічных лістоў Аркадзя Антонавіча Астаповіча да скульптурнай кампазіцыі Анатоля Пятровіча Кузняцова, ад жывапісных палотнаў Валянціна Віктаравіча Волкава да твораў керамікі Нэлі Георгіеўны Якавенка.
