Асаблівае месца ў творчасці Мікалая Трафімавіча Бандарчука займаюць ваенна-патрыятычныя творы, якія раскрываюць імкненне да больш эмацыянальнага і духоўнага мастацтва. Мастак называе свой стыль асацыятыўным рэалізмам, аб’ядноўваючы цікавасць да эпічнага і лірычнага пейзажа. У сваіх работах Мікалай Бандарчук вядзе дыялог з гледачом, укладвае сэнс і кадзіруе інфармацыю ў дэталях.
Мікалай Трафімавіч Бандарчук нарадзіўся 25 кастрычніка 1952 года ў вёсцы Сярэднія Печы Гомельскай вобласці – у цэнтры Палесся, паміж Мазырам і Туравам. Выхоўваўся ён у традыцыйна вялікай сям’і, у якой было 8 дзяцей. Прычым гэта была творчая, музычная сям’я, дзе ўсе ігралі на баяне і гармоніцы. У 1971 годзе скончыў Рэспубліканскую школу-інтэрнат па музыцы і выяўленчым мастацтве імя І.В. Ахрэмчыка, а ў 1976 годзе – Беларускі дзяржаўны тэатральна-мастацкі інстытут, аддзяленне манументальна-дэкаратыўнага мастацтва. З 1985 г. з’яўляецца членам Саюза мастакоў БССР. Прымае ўдзел у мастацкіх выставах з 1975 года. Працуе ў галіне манументальна-дэкаратыўнага мастацтва і станковага жывапісу.
Мікалай Трафімавіч Бандарчук спалучае педагагічную працу са значнай грамадскай дзейнасцю.У 2005 годзе ён стаў лаўрэатам прэміі імя А.І. Дубко “За творчыя дасягненні ў галіне культуры” ў намінацыі “Выкладчык года” Гродзенскага абласнога выканаўчага камітэта, а ў 2017 годзе – у намінацыі “Мастак года”. Узнагароджаны медалём Францыска Скарыны (2015), медалём Беларускага саюза мастакоў “За заслугі ў выяўленчым мастацтве”, а таксама ганаровымі граматамі Савета Міністраў і Міністэрства культуры Рэспублікі Беларусь. У 2020 годзе М. Бандарчук удастоены ганаровага звання “Заслужаны дзеяч мастацтваў Рэспублікі Беларусь”.
Творы Мікалая Бандарчука знаходзяцца ў Нацыянальным мастацкім музеі Рэспублікі Беларусь, Нацыянальным цэнтры сучаснага мастацтва Рэспублікі Беларусь, Дзяржаўнай гісторыка-культурнай установе “Гомельскі палацава-паркавы ансамбль”, Магілёўскім абласным мастацкім музеі ім. П.В. Масленікава, Віцебскім абласным краязнаўчым музеі, Гродзенскім дзяржаўным гісторыка-археалагічным музеі, у фондах Беларускага саюза мастакоў, а таксама ў Міністэрстве культуры Рэспублікі Польшча і галерэі “Арсенал” (Беласток, Польшча), Нацыянальным мастацкім музеі ім. М.К. Чурлёніса (Каўнас, Літва), Белгарадскім дзяржаўным мастацкім музеі (Белгарад, Расія), Чувашскім дзяржаўным мастацкім музеі (Чэбаксары, Расія), Мастацка-мемарыяльным музеі І.Я. Рэпіна (Чугуеў, Украіна), у прыватных калекцыях Іспаніі, Італіі, Францыі, Германіі і Даніі.
На выставе “Вандруючы па родным краі” будуць прадстаўлены творы, якія сумяшчаюць у сабе бесперапынныя творчыя пошукі ў адлюстраванні сваіх светапоглядных ідэалаў і характару на працягу жыцця мастака.
Выстава будзе працаваць да 27 ліпеня 2025 года.
